Na’e fakahoko ha float fakafonua ‘a Tonga ‘i he ‘aho Falaite 24 ‘o Sune 2022. Ke fakaha ‘a e poupou ‘a e fonua ki he ‘amanaki fepaki ‘a e timi liiki Mate Ma’a Tonga mo e Kiwi ‘a Nu’usila ‘i he ‘aho Tokonaki 25 ‘o Sune 2022 ‘i he mala’e ‘akapulu Mt Smart ‘i Aokalani Nu’usila.

Na’e fokotu’ututu’u ‘a e polokalama float ko ‘eni ‘e he Potungaue ki he Ngaahi Ngaue Fakalotofonua, Va’a Ngaue ki he Sipoti mo e Va’inga, ‘o fengaue’aki mo e Potungaue Polisi Tonga ke fakapapau’i ‘a e malu mo e hao ‘a e kakai ‘o e fonua lolotonga ‘a e float.

Na’e kamata ‘a e float ‘aki ‘a e lotu ‘a ia na’e tataki ia ‘e he Sekelitali e Tesi ‘o e Kau Takilotu Rev Viliami Polota pea ko e lea talitali na’e fakahoko ia ‘e he Pule le’ole’o ‘o e Potungaue, Akosita Polota. Na’e me’a foki heni ‘a e ‘Eiki Minisita le’ole’o ‘a e Potungaue, ‘Eiki Nopele Tu’i’afitu ‘a ia na’a ne fakahoko ai  ‘ene me’a fakalotolahi ki he teu ‘a e float pehe ki he talamonu ki he Timi Mate Ma’a Tonga ke nau ma’u ha va’inga fiefia mo melino foki.

Ko e  float ko ‘eni na’e kau mai ki ai ‘a e ngaahi potungaue ‘a e pule’anga, ngaahi kautaha ‘ikai fakapule’anga, ngaahi pisinisi taautaha, ngaahi ako kae pehe foki ki he ngaahi famili ‘o e kau va’inga.

Na’e ‘ikai ngata pe ‘i he vahe fonua Tongatapu ka na’e kau mai foki ki he float ko ‘eni ‘a e ngaahi tukui motu, Vava’u, Ha’apai, ‘Eua mo e Ongo Niua.

Ko e ‘aho fakafiefia ‘eni ki Tonga ‘a e kau mai ‘a e fu’u lauiafe ke fakaha ‘enau poupou ‘aki hono teuteu’i ‘enau ngaahi saliote misini, pasikala mo e ngaahi vaka ‘i Tahi  ‘aki ‘a e lanu kulokula mo hinehina. Taimi tatau pe na’e toe tokolahi foki mo kinautolu na’a nau lava mai ki loto Nuku’alofa ke mamata tonu ‘i he float ko ‘eni.

en_USEnglish